નજીવા કમિશનની લાલચ આપી 22 બેંક ખાતાં ખોલાવવાનો ખેલ, દેશભરમાં 41 સાયબર ફ્રોડની ફરિયાદો સાથે જોડાણ; ટેકનિકલ સર્વેલન્સ અને હ્યુમન સોર્સની મદદથી પાંચ આરોપીઓ પોલીસના સકંજામાં
મોરબીમાં સાયબર ઠગાઈના કરોડો રૂપિયાના નાણાકીય વ્યવહારોના પ્રકરણમાં સાયબર ક્રાઈમ પોલીસે મોટી કાર્યવાહી કરી છે. સામાન્ય અને જરૂરિયાતમંદ લોકોને નજીવા કમિશનની લાલચ આપી તેમના નામે બેંક ખાતાં ખોલાવી દેશભરમાં સાયબર ફ્રોડની રકમની હેરાફેરી કરવાના કૌભાંડમાં પોલીસે પાંચ આરોપીઓને ઝડપી પાડ્યા છે, જ્યારે આ સમગ્ર નેટવર્કનો માસ્ટરમાઇન્ડ ગણાતો ચેતન પલાણ સહિત છ આરોપીઓને વોન્ટેડ જાહેર કરી તેમની શોધખોળ શરૂ કરવામાં આવી છે.
મોરબી સાયબર ક્રાઈમ પોલીસની તપાસમાં સામે આવેલા આ પ્રકરણમાં કુલ રૂ.7,26,20,266ના શંકાસ્પદ નાણાકીય વ્યવહારો થયા હોવાનું ખુલ્યું છે. વર્ષ 2023થી 2025 દરમિયાન અલગ-અલગ બેંક ખાતાઓ મારફતે કરોડોની રકમની લેવડદેવડ કરવામાં આવી હતી. આ સમગ્ર કૌભાંડમાં મોરબીના લોકોનાં બેંક ખાતાંનો ઉપયોગ સાયબર ઠગાઈના નાણાં ટ્રાન્સફર કરવા માટે કરવામાં આવતો હોવાનો ખુલાસો થયો છે.
22 બેંક ખાતાં ખોલાવી કરોડોની હેરાફેરી!
પોલીસની તપાસમાં સામે આવેલી વિગતો મુજબ, આ સમગ્ર નેટવર્કનો મુખ્ય સૂત્રધાર ચેતન કિશોરભાઈ પલાણ હોવાનું સામે આવ્યું છે. તેના દ્વારા મોરબીના જરૂરિયાતમંદ લોકોને નજીવા કમિશનની લાલચ આપવામાં આવતી હતી અને તેમના નામે આશરે 22 જેટલાં બેંક ખાતાં ખોલાવવામાં આવ્યાં હતાં.
આ ખાતાઓનો ઉપયોગ અલગ-અલગ રાજ્યોમાં સાયબર ઠગાઈ કરીને મેળવેલી રકમ જમા કરાવવા અને ત્યારબાદ અન્ય ખાતાઓમાં ટ્રાન્સફર કરવા માટે કરવામાં આવતો હતો. UPI, IMPS અને RTGS મારફતે નાણાંની હેરાફેરી કરી બાદમાં રોકડ ઉપાડીને આર્થિક લાભ મેળવવામાં આવતો હોવાનો પોલીસ તપાસમાં ખુલાસો થયો છે.
ટેકનિકલ તપાસમાં પાંચ આરોપીઓ ઝડપાયા
આ ગંભીર ગુનામાં પોલીસે ટેકનિકલ સર્વેલન્સ અને હ્યુમન સોર્સની મદદથી તપાસનો દોર આગળ વધાર્યો હતો. તપાસના અંતે બેંક ખાતાં ભાડે આપવાના નેટવર્ક સાથે સંકળાયેલા પાંચ આરોપીઓને ઝડપી પાડવામાં આવ્યા છે.
પકડાયેલા આરોપીઓનાં નામ:
- હિતેશ મોહનભાઈ પૈજા
- ભાવેશ પ્રાણલાલ રામાવત
- બળવંતભાઈ દેવશીભાઈ વામજા
- પ્રકાશભાઈ નર્મદાશંકરભાઈ જોષી
- અશ્વિનસિંહ દોલુભા ઝાલા
પોલીસે આ પાંચેય આરોપીઓને ઝડપી લઈ આગળની કાયદેસરની કાર્યવાહી હાથ ધરી છે.
માસ્ટરમાઇન્ડ સહિત છ આરોપીઓ હજુ પોલીસ પકડથી દૂર
આ પ્રકરણમાં સૌથી મહત્ત્વની બાબત એ છે કે સમગ્ર નેટવર્ક સાથે સંકળાયેલા મુખ્ય આરોપીઓ હજુ પોલીસ પકડથી દૂર છે. પોલીસે નીચેના છ આરોપીઓને વોન્ટેડ જાહેર કર્યા છે.
- ચેતનભાઈ કિશોરભાઈ પલાણ
- રાજુભાઈ જોષી ઉર્ફે રાજુ બાબુભાઈ જોષી
- ભરતભાઈ બારડ ઉર્ફે ભરત રાવળ
- કિરણભાઈ કાંતિભાઈ પરમાર
- કાંતિભાઈ તરશીભાઈ પરમાર
- સુરેશભાઈ કાંતિભાઈ પરમાર
હાલ આ છ આરોપીઓને ઝડપી પાડવા માટે પોલીસ દ્વારા શોધખોળ અને આગળની કાર્યવાહી હાથ ધરવામાં આવી રહી છે.
દેશભરમાં 41 ફરિયાદો, ₹1.34 કરોડથી વધુની ફ્રોડ રકમ
આ કૌભાંડ માત્ર મોરબી પૂરતું સીમિત નથી. SAMANVAYA અને NCCRP પોર્ટલ પર આ નેટવર્ક સાથે જોડાયેલા બેંક ખાતાઓ વિરુદ્ધ દેશનાં અલગ-અલગ રાજ્યોમાંથી કુલ 41 ઓનલાઈન ફરિયાદો નોંધાયેલી હોવાનું સામે આવ્યું છે.
આ 41 ફરિયાદો સાથે જોડાયેલી સાયબર ફ્રોડની રકમ રૂ.1,34,53,796 હોવાનું પોલીસ તપાસમાં દર્શાવવામાં આવ્યું છે. જ્યારે સંબંધિત બેંક ખાતાઓમાં થયેલા કુલ શંકાસ્પદ નાણાકીય વ્યવહારોનો આંકડો રૂ.7.26 કરોડથી વધુ છે.
એટલે કે એક તરફ દેશભરમાં થયેલી 41 ફરિયાદોનું જોડાણ સામે આવ્યું છે, તો બીજી તરફ આ બેંક ખાતાઓના વ્યવહારોનો વ્યાપ ઘણો મોટો હોવાનું તપાસમાં બહાર આવ્યું છે.
પોલીસની જનતાને અપીલ: કમિશનની લાલચમાં બેંક ખાતાં ન આપતા
સાયબર ક્રાઈમ પોલીસે લોકોને ખાસ અપીલ કરી છે કે નજીવા આર્થિક લાભ કે કમિશનની લાલચમાં પોતાના બેંક ખાતાં અન્ય કોઈ વ્યક્તિને વાપરવા માટે ન આપવાં. અજાણ્યા વ્યક્તિઓ સાથે OTP, બેંકિંગ વિગતો કે અંગત માહિતી પણ શેર ન કરવી.
કારણ કે એક નાનું કમિશન મેળવવાની લાલચ વ્યક્તિને ગંભીર સાયબર ગુનાના કેસમાં આરોપી બનાવી શકે છે.
હવે પોલીસની નજર છ વોન્ટેડ આરોપીઓ પર
મોરબીમાં કરોડોના સાયબર ફ્રોડના આ નેટવર્કમાં પાંચ આરોપીઓની ધરપકડ બાદ હવે પોલીસ સામે છ વોન્ટેડ આરોપીઓને ઝડપી પાડવાનો પડકાર છે. ખાસ કરીને આ સમગ્ર નેટવર્કના મુખ્ય સૂત્રધાર ગણાતા ચેતન પલાણ સુધી પોલીસ ક્યારે પહોંચે છે અને તેની પૂછપરછમાં સાયબર ફ્રોડના નાણાકીય વ્યવહારો અંગે હજુ કેટલા નવા ખુલાસા થાય છે તે જોવું મહત્ત્વનું રહેશે.
મોરબીમાં સામાન્ય લોકોનાં બેંક ખાતાંનો ઉપયોગ કરીને દેશભરમાં સાયબર ઠગાઈના નાણાંની હેરાફેરી કરવાના આ કૌભાંડમાં પાંચ આરોપીઓ ઝડપાઈ ચૂક્યા છે, પરંતુ માસ્ટરમાઇન્ડ સહિત છ આરોપીઓ હજુ ફરાર છે. હવે પોલીસની આગળની કાર્યવાહી પર સૌની નજર છે.
